काभ्रे–गत मंसिर ३० गते मृत अवस्थामा फेला परेकी मण्डनदेउपसर नगरपालिका १० हल्देकी कान्छी दमाईको हत्या भएको पुष्टि भएको छ । उनको हत्या गरेको आशंकामा १७ वर्षका एक किशोर पक्राउ परेका छन् ।
दमाईको शव घरबाट ४०० मिटर उत्तरतर्फ छिमेकीको बारीमा फेला परेको थियो । स्थानीयबासीले उनको मृत्यु बाघको आक्रमणबाट भएको आशंका गरेका थिए । प्रहरीले उनको शव पोष्टमार्टमका लागि धुलिखेल ल्यायो । तर, उनको मृत्यु कुनै जंगली जनावरबाट नभई गहिरो चोटका कारण भएको र त्यो चोट जनावरको आक्रमणबाट नभएको पोष्टमार्टम रिपोर्ट आयो ।
कान्छी दमाईको हत्या भएको पुष्टि भएपछि जिल्ला प्रहरी कार्यालय काभ्रेले विशेष टोली परिचालन गरेको थियो । सोही क्रममा मृतकले लगाउने गहना सुन पसलमा बेच्न ल्याउने मानिसहरुमाथि शंका गर्दै थप अनुसन्धान गर्ने क्रममा एकजनालाई पक्राउ गरेको छ । पक्राउ पर्ने सोही ठाउँका अन्दाजी १७ वर्षका वुद्ध तामाङ हुन् । कान्छी दमाईले लगाएको गहना बेच्ने क्रममा उनलाई पुस १३ गते नियन्त्रणमा लिएर अनुसन्धान थालिएको प्रहरीले जनाएको छ ।
जिल्ला अदालत काभ्रेबाट ७ दिनको म्याद लिई घटनाको अनुसन्धान भइरहेको छ ।
